ចិន ប្តេជ្ញាយ៉ាងមុតមាំការពារអធិបតេយ្យ សន្តិសុខ និងផលប្រយោជន៍ខ្លួន

ការប្តេជ្ញានេះធ្វើឡើង បន្ទាប់ពីមានសេចក្តីប្រកាសដាក់ទណ្ឌកម្មរបស់អាមេរិក ប្រឆាំងនឹងមន្រ្តីចិន 2 រូប ពីបទរំលោភសិទ្ធិមនុស្សធ្ងន់ធ្ងរ ប្រឆាំងនឹងមូស្លីមអ៊ុយហ្គួ។

ឯកសារ ប្រព័ន្ធផ្កាយរណប និងភស្តុតាងពីការបង្ក្រាបរបស់ចិនទៅលើអ៊ុយហ្គួ ត្រូវបានលោក Blinken ចាត់ទុកជាការប្រល័យពូជសាសន៍ ហើយទាមទារឱ្យបញ្ចប់ទង្វើនេះ ដោយដោះលែងអ្នកទោសនៅតំបន់ Xian Jiang ទាំងអស់នោះ ពីការឃុំឃាំង។

ចិនក៏បានប្រកាសដាក់ទណ្ឌកម្មប្រឆាំងនឹងអ្នកនយោបាយអ៊ឺរ៉ុបចំនួន១០នាក់ និងអង្គភាពចំនួន៤ ពីបទ ផ្សព្វផ្សាយការកុហក និងព័ត៌មានមិនពិត។ ពួកគេនឹងត្រូវហាមឃាត់មិនឱ្យចូលទៅកាន់ចិនដីគោក ហុងកុង និងម៉ាកាវ ខណៈដែលក្រុមហ៊ុន និងស្ថាប័នពាក់ព័ន្ធរបស់ពួកគេត្រូវបានហាមឃាត់មិនឱ្យធ្វើពាណិជ្ជកម្មជាមួយចិន។ 

ប៉ុន្តែលោក David Sassoli ប្រធានសភាអ៊ឺរ៉ុប បាននិយាយថា ការដាក់ទណ្ឌកម្មរបស់ចិនទៅលើ អនុគណៈកម្មាធិការសិទ្ធិមនុស្ស និងស្ថាប័នសហភាពអឺរ៉ុប មិនអាចទទួលយកបានទេ ហើយនឹងរឹតតែមានផលវិបាក ព្រោះវាមិនបានផ្លាស់ប្តូរការប្តេជ្ញាចិត្តរបស់សហគមន៍អ៊ឺរ៉ុប ក្នុងការការពារសិទ្ធិមនុស្ស នោះទេ។

ប្រភព៖ CNN